الخميس، 5 مايو 2011

ليش معمر زعلان ؟

معمر حرجان وراقيله القاز والزيت والضغط لأنه كان يحساب روحه هو وبس اللي يعرف ايدير ثورات..وكان يحساب ان كلمة "ثورة" هي مصطلح محجوز ليه ولعيلة القذافي وللفاتح امتاعه وبس.

لكن ثورة 17 فبراير يوم بعد يوم تثبتله أن الثورات الحقيقية المزبوطة اللي بالفعل طالعه من صميم معاناة الشعب هي ثورات "صقع عليه" وصقع على كل ضباطه وتنابلة قصر سلطانه ولا يقدر عليها لا هو ولا صغاره ولا مرتزقته.

حبل الكذب القذافي قصير لكن صبر وطيبة الشعب الليبي هي اللي خلّت حبل كذب القذافي يطوال 42 سنة..سنة تخبط في الثانيه.


زمان أيام الغفله ضحك علينا الملازم معمر بشوية كلمات حلوه في بيانه الاول للانقلاب في هاضاك اليوم الاسود 1 سبتمبر 69..والشعب الليبي الطيب صدق الملازم معمر وجماعته في البداية..كلنا نعرف أن الربيع من فم الحوش يبان، لكن الشعب الليبي الطيب صبر وتحمل مدة طويلة بيش يتأكد ويكتشف على أرض الواقع ان كل اللي قاله معمر كذب في كذب..وأن هدف معمر النهائي والوحيد هو ان يوصل لكرسي الحكم بيش يألف مسرحية اسمها "سلطة الشعب" تضمنله حكم ليبيا بحجة "الشرعية الثورية" طول عمره، وتضمن لصغاره وصغار صغاره حكم ليبيا الى يوم يبعثون بحجة انهم ابناء واحفاد "قائد الثورة" وفيلسوف ومفكر العصر ملك ملوك افريقيا الاعلامي والرياضي والعسكري الأول وحتى الحرس البلدي الأول والصقر الاوحد محرر عصر الجماهير القائد العقيد رسول الصحراء وعميد الحكام العرب والحكيم العالمي معمر بومنيار القذافي.

معمر زعلان وداير بيه وبصغاره الدجاج لاسود وعويله قاعدين حايسين فيها قتل وتقطيع وتهجير في الليبيين لأنهم ما يقدروش يستغنو عن عيشة السلاطين والاميرات اللي كانوا عايشينها بفلوس الليبيين ومش طايقين يسمعو كلام غير كلام بوهم اللى درهت كبودنا واحنا نسمعو فيه من التسعه وستين.

هي مش كسرة الخشم اللي قدّمها الشعب الليبي للمتغطرس معمر وبس السبب الوحيد في غضبة ونقمة معمر على ليبيا والليبيين، فيه سبب ثاني وراء حقد القذافي وعيلته وحزبهم للجان الدموية على الليبيين وهو أن معمر القذافي فاق وناض متأخر على صوت الحقيقة اللي اتقول أن الثورات الحقيقية تبدأ من الشعب وفي الشارع ومش في ثكنات العسكر ودماغات عبيد السلطة وأن الثورات الشعبية الحقيقية اللي ما تصنعش من قايدها "آلهة" هي اللي تنجح لأنها قريبة من قلب وفكر الشعب ومش حكر على عيلة القذافي ولا على رفاقه الانانيين المتكبرين ولا على عبيده من رفاق الشر.

معمر وصغاره مرعوبين وخايفين ومستعدين ايديرو اي حاجه في سبيل ان ترجعلهم الابهة والفلوس والمركز والهيبة اللي داروها بفلوس الليبيين..واعتقد ان كل الليبيين الشرفاء يعرفو ان معمر وعصابته ممكن نتوقعو منه ومنهم أي شئ لأنه انسان متكبر ومتغطرس ومصدق انه فيلسوف ومفكر كبير وما يهمه الا منصبه والمليارات لصغاره ولكل من يهتفله ويرقصله.

العقيد معمر وعيلته بعد كل هذه السنين السودا يحسابو روحهم امتلكو واحتكرو مصطلح "الثورة" ويحسابو الشعب الليبي جاهل ومتأخر وما يعرفش الصالح من الطالح..لكن ثورة 17 فبراير فرضت عليهم غصبا عنهم ان يشوفو ثورة جديدة بكل معني الكلمة وخارجة عن طاعة الدكتاتور اللي كان يحساب انه هو الوحيد اللي يقدر يفكر في الثورة..وانه لا يمكن بعد "تورته" اتصير اي ثورة ثانيه في ليبيا بدون اذن او تصريح منه او من صغاره!

من المشاكل الكبيره والمصايب اللي يواجهها الشعب الليبي المنكوب بعيلة القذافي، هي ان عيلة القذافي بالفعل مقتنعين انهم هم الوحيدين اللي يعرفو مصلحة ليبيا ومصلحة الشعب الليبي بدليل انهم مصرّين على الاحتفاظ بمنصب "للقايد" في الدستور اللي قاعدين يخربشو فيه..وانه لازم يكون اسم بوهم مذكور في الدستور وكأن ليبيا هذه اصبحت ملك ليهم ويتصرفو فيها زي ما يبّو.

القذافي وصغاره في حاجة لدروس في التربية وطريقة مخاطبة الجماهير ولازم يعرفو ولازم يتعلمو كيف يتكلمو مع الشعب الليبي وكيف يوقفو قدام الشعب الليبي لأنهم من اكبر كبيرهم لاصغر صغيرهم مش خير من الليبيين الثانيين..ولازم يعرفو ان عصر الانقلابات زي انقلاب بوهم عدى وقته ورانا نعيشو في القرن الواحد والعشرين وانه اذا كان زمان على سبيل المثال ما كانش عندنا صور لعمليات قتل ضحايا سجن بوسيف (بوسليم سابقاً)، راهو اليوم في ليبيا صار عندنا الآلاف من الصور والفيديوات لكتائب القذافي وهي تقتل وتمزق برصاصها اجساد الاطفال والنساء والشيوخ والشباب باوامر من ملك باب العزيزية..ولازم عيلة القذافي تسمع وتعرف ان العالم كله من شرقه لغربه ومن شماله لجنوبه شاف بعيونه وسمع بوذانه همجية ووحشية وأنانية وتكبر عيلة القذافي وأن العالم شاف الوجوه الحقيقيه للقذافي ولكل من كانوا ايديرو في عمليات التجميل للوجه القبيح لأسواء واقبح واحلك فترة حكم مرت بيها ليبيا وهي فترة حكم عيلة معمر بومنيار القذافي.

القذافي مصمم من زمان ان يدخل التاريخ وبالفعل خش معمر وعيلته التاريخ ولكن من اقذر واوسخ وانذل الابواب..والشعب الليبي زي ما قاعد يتذكر في جرايم الطليان، مش حينسى ابدا جرائم القذافي وعصاباته..جرائم القذافي اللي شفناها وشافها العالم في الكثير من مدن ليبيا ووحشية وعنف جماعته وطريقة التهديد والوعيد والاستفزاز اللي كلمنا هو وولده سيف بيها ما هي الا الدليل الوافي والكافي على وجود كم كبير من الامراض النفسية والجهل لدى قائد انقلاب "الفاتح" لتسويق الفشل ومساعديه. سيتذكر الليبييون دائما وابدا ان معمر وعصابته هم من بدأوا في كل هذا الدمار وهذا القتل والتهجير لليبيين..والليبيين مش حينسو ابدا أن السبب وراء  تحول المظاهرات السلمية الى ما اصبحت عليه الآن من صدامات سببه غطرسة وتكبر ودكتاتورية معمر القذافي وليس ثوار 17 فبراير..والعالم شاهد كيف كانت بداية ثورة 17 فبراير المباركة وهذا لن تستطيع اي قوة ان تمحيه من ذاكرة التاريخ.

في ليبيا اليوم والحمد لله بالفعل فيه شعب يصنع ثورته بدون معمر وتخربيشه ومش في حاجه لقايد موديل معمر 69 ومش في حاجه لا للفقه الثوري القذافي ولا في حاجه لفكر واحد دكتاتوري كل ما يهمه هو مجده الشخصي ورفاهية عيلته وعبيدهم.

في ليبيا اليوم الشعب الليبي بالفعل يصنع ثورته بروحه وبدون نظريات معمر وبدون كتابات معمر وفلسفة معمر..اليوم ليبيا فيها ثورة حقيقية نابعه من معاناة الشعب ومش في حاجة لمعمر وعيلته وخطوطه الحمراء وتفتيشه الدايم عن الشهرة!

الشعب الليبي مستعد يدفع الغالي قبل الرخيص علشان يتحرر من خنقة معمر وعلشان يفتك من دراه الكبيده اللي جابه معمر وعلشان يتنفس هواء الحرية بدون جميل او صدقه من أي قذافي..الشعب الليبي ولو انه عاش كل هالسنين مفلس بدون فلوس بتروله اللي وزعهم معمر على المرتزقة الافارقه، الا ان هالشعب الصابر مازال يملك ثمن وحق الحرية ويعرف ان الحرية اللي اتجي من الشعب هي اشرف واحسن وألذ من الحرية المزيفة اللي ايجيبها دكتاتور دموي ماعنداش ولو ذرة احترام لشعبه اللي وصفه بالمقملين والزنادقه والجرذان وصفات ثانية حتى الصايع يتحشم يقولها فما بالك ب "قائد أممي"!

ثوار 17 فبراير في ليبيا اليوم يبو يبنو المدارس والمستشفيات والمساكن والمصانع والفنادق في ليبيا مش في بلاد الواك واك زي ما كان يبّي العقيد وصغاره وشلتهم.

ولهذا ثورة 17 فبراير هي الثورة الحقيقية مش "الفاتح" امتاع اللي يحسابو روحهم علمونا حب الوطن ومعنى الانتماء للوطن. الوطن مش معمر..وليبيا مش القذافي والفاتح..الفاتح اللي ما فتح الا بيبان الفساد والظلم والقتل والخنبه والتبلعيط. 

 الشعب في ليبيا اليوم يقول بالفم المليان لمعمر القذافي: انت مش ربنا ومعادش طايقين انشوفوك لأنه شوفتك تذكرنا بسنين حكمك الظالم ولا حابين نسمعو صوتك مرة ثانية لأن صوتك يذكرنا بالمصايب وبالمجاعة والقتل ورانا فدّينا من قذافك..خطانا يا راجل..حل عن سمانا..معادش نبّوك..زيد فيه..ارحل..ارحل..ارحل

 تمسو على خير

ولد بلاد

5 مايو 2011

ليست هناك تعليقات:

إرسال تعليق