الأحد، 17 أبريل، 2011

رسالة من مصراته الوفاء



الله والنبي يا قرد ياقردافي.......يخونك قريب والغدر ماهو كافي

************

والغدر ماهو لينا .........لا نعرفوه ولا عليه اربينا

ولكن بندعوا بالله ياعالينا......ضربه مليحه اتقطعه طراافي

************

قطع اقلوووب الغاليين علينا .......وسحن كبد ميمه تربي فينا

ورقرق العيل دمعته في عينه....  وخلى عمار الناس رمل وسافي

************

كمشة كلاب اليوم هد علينا.....مدرب مسلح بسلاح رزينه

قداش جافوا وقداش راح رهينه....كتائب لقيطه ومصنفه صنافي

*******

صواريخ دزلنا ومن الجنود سفينه.... ومن الزريق يطلق ويوصل ف طمينه

خرب مصانعناوهد المينا.....وحتى المساجد  تفترشت شقافي

*********

ولعنة الله علي ايقاتل فينا....سود القلوب ورافعين علينا

وبفضل ربي والشجاعه لينا ....شرادمكم تطفح وفي بحرنا اطافي

*******

فراسين رانا والفراسه لينا.....كبرنا وشبنا وعار ما خلينا

جرواك  بعت اليوم وبترشينا....يموت الكريم ياقرد مايرشافي

*******

نادى الوطن والنداء لبينا.... بدم الشهيد قداش اليوم روينا

ماهوجميل يالعزيزعلينا....وفي شان يرجعلك ترابك صافي

*******

صمدنا وعزمنا والشمل لمينا....انطمن اصفوف فراسينا العظيمه  

زحفنا وهجمنا والاحقاد نسينا.... واليد وحده وما فيش اخلافي

*******

انت تريد تردمه ماضينا....ولكن اليوم نكتبوه بيدينا

خلفت ابطال والكل ينسب فينا.....ال رمضان الشهامه والقلب الصافي

*********

والكبش الاقرع اللي يهدد فينا...وصبعه مطول ومحمر عينه

للرب ندعوا في عقاب اسنينه ... يدور بين الناس قدمه حافي

*********

يابوعباه يابو ملامح شينه....لا ليك نخضع يوم لا اترجينا  

ناوي الفتنة ياقرد تزرع فينا .... نسيت الاخوة والقلب الصافي

*********

لا ماتهنى اليوم ياغازينا.....لا نوم ترقد ولا اتهمد عينه

بقدرة العالي وبنصرته والعينه... ليك نوصلوا وانقطعوك انصافي

********

انقول للشهيد  مبروك ياغالينا... امك تزغرت ,فيك ماتعزينا

وبجنة الخلد واعدك عالينا....اختارك المولى يا العزيز الوافي

**********

نزفتي اليوم يا غاليه يازينه...قداش تجريحك صعيب علينا

لله ندعوا ورافعين ايدينا ...يقبل شهيدك والجريح يعافي

*********

بكرة تعودي مزينه ورزينه....عمار وشوارع مرشقات الزينه 

ياام النخل شامخ ويرزق فينا....يأم الشواطي والرمال الدافي

*******

وحق ترابك ياالعزيز علينا...ياعمر ويشرف عليه أرضينا

يا انموت موتة عز واتهنينا ...وهدا كلام وما عليه اخلافي

*******

عالله المولى يقبل ادعاوينا  .... ويرسل عداب عللي يعدب فينا

 وبنختم وواجب الصلاة علينا ....علي المصطفى صاحب العهد الوافي

قلم مصراتة الثائر- م

تحية عز وكبرياء الى اهلي في مصراته

وحتى واني بعيد عليهم قلبي لم يغادرهم ولا لحطه لكم الوفاء يابلد الوفاء

واسمى ايات الود الى شبابنا الثائر اخواني وابناء عموماتي وجيراني واصدقائي

واشد علي ايديهم ومن نصر الى نصر

والله اكبرالله اكبر الله اكبر

هناك تعليق واحد:

  1. كلام رائع و جميل جدا و لكن للأسف هدا اضعف الايمان منك بصفتك كتبت هدا الكلام و انت مسترخ علي كرسي دوار و اهك و دويك يموتون و يعدبون كل ساعة و الاشد أسفا انك ملقب نفسك ب الثائر

    ردحذف