الاثنين، 11 أبريل، 2011

ترى خبر ياوادي زين علي في مصراته صار





ترى خبر ياوادي زين... على اللي في مصراته صار
العيل ما طقش عامين... طريفات مقطع واشطار
وتشريد وقتل نساوين... وتدمير مساكن واعمار
بكينا دمع المقهورين... على خدينا سال انهار
وين صقورة سوف الجين... ووين زليطن عز الجار
الساحل والخمس وسيلين... ووين قماطة وقصر خيار
ومسلاته رجال الدين... انا مسلاتي ومنكم معتار

كيف رقدتوا مرتاحين... بعد رفعوا خيرة الاخيار
عمران وحمزة شيخين... وتريس واجد وشباب صغار
ووين ترهونه الفزاعين... من القصيعة للمطار
وتريس القصر الركابين... كحيلة شقاقت الغبار
ياجفارة سكانك وين... جبل نفوسة صار دمار
وين زلطن وين رقدالين... وياجميل زوارة بتنهار
صبراته وصرمان اثنين... والعجيلات ثلاثه اكبار
نصرتكم للزاويين... هللي مايرضوا بالعار
فراسين اولاد فراسين... وكتبو في التاريخ اسطار
جنوب ليبيا مش منسيين... ياكفرة يانور ونار
وياسبها للأسد عرين... وياغدامس واحة الاسرار
وكل الناس المحرارين... في صحرتنا دار دار
وسرت معادن وفراجين...ما يخافوا يهدوا على النار
في القرضابية معروفين... شن داروا للاستعمار
الشرق تريس ومكرامين... وكتبو بدم الابرار
تاريخ مشرف وحزين... وياما المجرم فيهم دار
ندايا لكل الليبيين ... وما يخص كبار ولاصغار
نوضوا هبوا باسم الدين... ودودوا عن حوض المختار
وبالنصرة كونوا واثقين... ربي لعباده نصار
معانا ربى العالمين... مش كمشة عبيد ودولار
وشهدانا في عليين... وقتلاهم في قعر النار
ونختم بصلاتي على الزين... محمد نينا المختار
وادعولي يامسلمين ... نموت شهيد بكل فخار

اخوكم الزروق ابوعنيزة من مسلاته








هناك 11 تعليقًا:

  1. لقد أسمعت لو ناديت حيا ولكن لا حياة لمن تنادي

    ردحذف
  2. أسأل الله أن يرزقك الشهادة

    ردحذف
  3. العجيلي المهاجر11 أبريل، 2011 12:21 م

    صحيت وصح لسانك والله انك رقرقت الدمعة في عيني وانا في بلاد الغربة لاحول لي ولا قوة


    العجيلي المهاجر

    ردحذف
  4. ماشاء الله صح لسانك ياخوي يارب اهدي كل الليبين ليقفوا يد وحدة ضد هذا السفاح الاناني التعيس اشكالون وباذن النصر قريب ان شاء الله يارب ياوخيي ربي يطول في عمرك وايناولك وايناولني الشهادة في سبيله والله ياوخييني نفخر بيكم ربي يحميكم وايقويكم علي هالمجنون واتباعه ويرسل جنوده الذين لانراهم يارب عجل بالنصر وبالفرج يارب

    ردحذف
  5. صحيت وصح لسانك والله انك رقرقت الدمعة في عيني وانا في بلاد الغربة لاحول لي ولا قوة

    ردحذف
  6. صح لسانك يا مسلاتي عشت

    ردحذف
  7. جعل الله هدا النداء الطيب للم الشمل على كلمة سواء لكل اهل ليبيا لتحرير بلادهم من هدا الطاغية فى ميزان حسناتكم

    عبدالله

    ردحذف
  8. محمد خليل
    الشعر الشعبى كان أحد أهم العوامل المساعده على زيادة الحماس لذى المجاهدين ، ولكن أقول لشاعرنا أن كل شخص يعمل بأصله ، والقليل صافى.

    ردحذف
  9. عيني رقرقت الدمعة وانا في بلاد الغربة

    ردحذف
  10. بارك الله فيك ، وصح لسانك .

    ردحذف
  11. أزال المؤلف هذا التعليق.

    ردحذف